گلگت(سٹاف رپورٹر)گلگت بلتستان کی سرکاری ٹرانسپورٹ کمپنی نیٹکو کے فری پاس ختم کر دئیے گئے ہیں۔تمام سیٹیں آن لائن سسٹم سے بک ہونگی۔ دو سیٹیں برائے بزرگان، خصوصی افراد مختص ہوں گی البتہ سٹوڈنٹ کو رعایت برقرار رہے گی۔ نیٹکو سے جاری ہونے والے اعلامیے میں مفت سفری پاس جو ضرورت مند شہریوں کی مدد کے ارادے سے متعارف کرائے گئے تھے بدقسمتی سے غلط استعمال ہوئے جس سے اس اقدام کے مقصد کو نقصان پہنچا۔ اس لئے مفت سفری پاسوں کا اجرا فوری منسوخ کیا جاتا ہے۔اس نئی پالیسی کے مطابق ہر گاڑی میں دو سیٹیں خصوصی طور پر نیٹکو اور حکومت گلگت بلتستان کے افسران اور اہلکاروں کے ہنگامی دوروں کیلئے مخصوص رہیں گی۔ یہ نشستیں صرف جنرل منیجر، مسافر آپریشنز کے ذریعے منیجنگ ڈائریکٹر یا منیجنگ ڈائریکٹر کی طرف سے مجاذ کسی دوسرے سینئر افسر کی منظوری پر مختص کی جائیں گی۔ ایسے حالات میں جہاں کوئی ہنگامی سرکاری دوروں کا شیڈول نہیں ہے مخصوص نشستیں خصوصی طور پر معذور افراد اور بزرگ شہریوں کو ٹکٹ کی قیمت کے 50% کی رعایتی شرح پر مختص کی جائیں گی تاہم، طلبا کے لیے رعایتی نرخوں پر زیادہ سے زیادہ پانچ نشستیں مختص اور فوجی اہلکاروں کے لیے کوٹہ اگلے احکامات تک برقرار رہے گا۔ نیٹکو کی انتظامیہ کا کوئی افسر کسی بھی سٹیشن منیجر کو کسی بھی حالت میں مفت نشستیں مختص کرنے کی ہدایت نہیں کریگا۔ یہ پالیسی فوری طور پر موثر ہے اور تمام متعلقہ محکموں اور اہلکاروں کو اس پر سختی سے عمل کرنا چاہیے۔ خلاف ورزی کی صورت میں ذمہ داروں کے خلاف سخت تادیبی کارروائی شروع کی جائے گی۔
